SASAB
Dimuat
dina koran Sunda
15 april 2006
Geus jauh teuing ngalengkah teh
Ninggalkeun tali-tali paranti ngaji diri
Kasered caah unggal wanci
Leutak pagaliwota jeung runtah, motah
Ngemprakan nu teu bisa unggah
Geus jauh teuing geuning kasered teh
Kabawa gumuruhna napsu diri nu teu maranti
Pangharepan ngarawel geusan pamuntangan
Jukut riut, alimusa, eurih
Saukur pangbebenjo ku kapeurih
Ngeset hate nu kapepende
Enya, nurih raheut kapeurih
Gusti paparin areuy geusan pamuntangan
Nu ngajait tina nyeotna leuwi
Nu ngangkat tina ngaplakna sagara
Sagara, enya sagara katunggara
BANJAR DINA
KINANTI
Dimuat dina priangan
24 Februari 2010
Bagja paparin nu agung
Anca lampah nganti-nganti
Nanjeur banjar jadi kota
Jurung nanjung lemah cai
Angkat darajatna warga
Rahayat kudu di sungsi
Ieu banjar nu pinunjul
Digjaya euyeub pangarti
Adiluhung tur bersĕka
Muntang mundut rido gusti
Akur saban warga dĕsa
Nĕmbongkeun raharja mukti
Sabot niat
Dimuat dina priangan
24 Februari 2010
Renghap ombak ngalarung tungtung umur
Kagalémohan hambalan-hambalan wanci
Nu kalis kaduruk layung kamari
Pucuk seuneu na ramo lilin beureum
Katebak ringkang tanggara
Kalucas-kalices..
Pes…pareum
Cakueum….
Heureut lampah teu wasa ngalengkah
Kaeurad nirca, culika, deleka,
Rumasa..
Gurat kalang natrat satukangeun lawang
ngondang balebat
Naha?
Geuning nu datang layung deui layung deui
Reup…pareum
Cakueum…
Sabot niat ngajarumat benang pegat
Ngayuman waktu nu rek lumaku
Hawar-hawar sora léngkah
Ngajauhan…jauh…beuki jauh…les
Reup…pareum
Cakueum…
Jatinangor, 2009
SAJAK KEUR BANJAR
Dimuat dina priangan
24 Februari 2010
Pirang waktu nu lumaku
Ngajarumat kembang-kembang kahayang
Lebah tepis wiring wanci
Ngemu laksa harti sajati
Jati diri nu di sungsi
Banjar karang pamidangan
Banjir pangarti nu suci,
Bihari nagrina linggawesi
Laju ketakna para kompeni
Natrat ngagurat dina sajarah
Kasebit ku eusi dangding
Kasebat dina wawacan
Kiwari ninggang takdir kana pasti
Banjar ngajadi
Ngariksa harta, diri, lemah cai
Nu mandiri
Ka rahayat, geura hanjat wangun banjar
Ku kahĕman
Ka pangagung, poma adigung
Ajeg panceg kana jangji
Banjar idaman paparin gusti
Tahrim
Dimuat dina mangle
15 april 2010
Tahrim-tahrim nyaliksik wanci janari
Béh balé kambang, tajug, masjid agung
Ngoréjatkeun nu keur mangprung
Di jalan, di laut, di gunung
Di hotél, di langit, di kantor
Di udag maung
Kolépat
Lelembutan mubus embun-embunan
Nguliat megatkeun kawalat
Anggel, simbut parebut silih jenggut
Kuring gelut jeung simbut
Kélanan…sstt
Tahrim bale kambang bet jadi maskumambang
Panggero masjid agung kasilih juru demung
Nu di tajug ujug-ujug nyurup pucung
Gerung-gerung
Taki-taki rek mangprung
Ka jalan, ka laut, ka gunung
Ka hotel, ka langit, ka masjid agung
Assolatu khoirumminannaum…
Assolatu khoirumminannaum
Biur mangprung
Ka masjid agung
Di udag maung
Jatinangor, 2009
Hujan luhur astana
Dimuat dina priangan kaping 28 juli 2010
Hujan luhur astana
Sabot teuteupan séséléké tukangeun keueung, teu kalis
Neumbrag samoja, kembangna tingkoléang katoél takdir
Marahmay, tinggelenyu nutup teuteupan
hujan panceg, pageuh
nyebrut ninggang taneuh, nurut pamundut
Awak jibreg cimutmut
Nu ti tadi nangtung, miharep hujan jadi sagara
malidkeun runtah na jero dada
hasud, adigung, munapék,
sirik, pidik, musrik
Girimis mungkas pancén nu maha suci
Samoja beuki atra, kembangna ngampar sadrah kana kanyaah
kakubur taneuh astana, sawaréh palid ngayuman cileuncang
Teuteupan euntreup di puseur astana
Lebah lombang kosong nyangkeredong
Gugupay
Bagja kembang samoja
Dihayap taneuh astana taya cidra taya culika
Astana cikuda 2009”
Eundeuk – Eundeukan
Dimuat dina priangan kaping 28 juli 2010
Dulur
Beurang geus ngajak tandang muka sandiwara anyar
Lalakon nu rek medar Dialokan ku kalangkang
Campala ngajadi rajah pamuka
Muka diri muka ati
Muka sajatining harti
Eundeuk-eundeukan
lagoni
Meunang
peucang sahiji
Leupas
deui ku nini
Beunang
deui ku aki
Hirup mah apanan eundeuk-eundeukan
Aya luhur aya handap, aya beunang aya leupas
Aya bagja aya suda, aya ceurik aya seuri
Cara aki jeung nini, sarua keur nyandiwara
mulas lambaran-lambaran lampah
nohonan tetekon pikeun lalakon
tanggara na saban lengkah
maturan renghap
samemeh datang pinasti
dulur
sing tarapti diri
balebat geus ngajak kebat
nyerangkeun nu keur jongjon eundeuk-eundeukan
teu malire hate nu salawasna rehe
hayu mulang, tuh batur geus nungtutan
ninggalkeun pakalangan, kahade obor awi nya
karari,
keur
narawangan jalan nu baris kasorang
sandiwara geus lekasan
cunduk ninggang waktuna
manusa teu walakaya
Cimaragas 201
GIRIMIS
NU SALIN JINIS
Dimuat dina priangan kaping 28 juli 2010
Girimis kasorenakeun
ngantebkeun sawangan nu gugulantungan luhureun tarang
nilik diri nu teu surti, mawa raga nu teu wasa
nuturkeun aji nu maranti
awak rempo, lalinu unggal waktu
pananya ngaduruk
jero dada
nyangkaruk hanjelu teu manggih tungtung
hanjakal ngabayah na letah, na hate, na dada
laju nyelek na tikoro, ngampar na eusi tarang
walatra nepi ka kacapuri
girimis lumengis
nenjo awak nu geus salin jinis
tanaga ledis balas nyurung-nyurung pangajak rasa
mudalkeun pangharepan nu samar kahayang
kiwari jalan narawangan, sanajan layung geus teu
surti
kana wanci
girimis geus salin jinis
jadi mangrewu-rewu jamparing, tingbelesat
dipentangkeun balebat rupa gondewa, tingkolepat
mapay nyawa
niruk dada
dina renghap-renghap panungtungan
Cimaragas 2010
Sabada Janten Pajabat
Sabada jeneng janten pajabat
Salira katingal langkung hébat
Unggah mércy turun mércy, dampaleun karpét sayogi
Korsi empuk tina busa nu pangawisna
Artos caah, ti kénca ti katuhu ti luhur ti handap
minuhan saku
Lir ciliwung, nu ngahurup puseur nagri
Calik, rapat, ngémut, istirahat, padungdengan
ngawakilan rahayat
Saurna...
Ni’mat naker janten pajabat
Studi banding uang saku, rapat husus uang saku
Ancag-incig uang saku Sagalana uang saku
Saurna kitu
Gan?
Ah wajar nya Gan da sadayana kanggé rahayat
Sugan...
Sabada jeneng janten pajabat
Mung raraosan mah asa aya nu ical Gan!
Kapungkur mah agan téh béréhan, nyaahan, akuan
Éta lambey teu weléh gumujeng
Raray marahmay, caang narawangan harepan
Ka cacak kuricakan, ka pakir, geus lir nu miskin Ngangken wargi.
Naha?
Kamana Agan ayeuna, bujeng-bujeng ngangken wargi geuning
Ditaros gé teu ngawaler, hilap Agan teh??
Sibuk panginten nya Gan!
Ieu abdi nu waktos kamari ngabagi-bagi rejeki
Geuning basa waktos subuh-subuh
Tuturubun
ngawur-ngawur angpau
Hilap nya Gan!
Wilujeng Gan, abdi mah badé wangsul.
Mung itu aya salam ti jalan ronda, musola, balé
désa Saurna diantos
Mugia suanten agan nu kapungkur harus teu robih
janten heuras
Heuras sabada jeneng janten pajabat
Heuras sabada lambey digagantelan ku jangji sareng
amanah
Cimaragas 2010
NGAGUSUR
LUMAKU
Séréngéhna srangéngé unggal poé
Geus sabaraha réwu kali katénjo
Gelenyuna layung nu rék suwung
Geus sabaraha réwu kali teu kaitung
Dina tungtung-tungtung léngkah
Ngaliwatan taneuh belah
Jeung leutak sawah
Kadé salah nincak
Kadé salah nénjo
Tikoséwad
Sabab waktu ngagusur lumaku
Dina saban léngkah
Beuki deukeut beuki téréh
Beuki deukeut
Nepi ka pangancikan
Teuing poék teuing caang
Ukur nyorangan
SAHA TÉA
Basa lampah lumaku nyusud kanyaah
Mapay tapak nu geus lila katincak
Kawirahmaan gentra kahéman
Na saha téa atuh anjeun téh?
Bet kumawani ngaguratkeun kalam
Dina lambaran kahirupan
Tuh hideung, beureum, biru, héjo
Natrat ngagurat
Naha saha téa atuh anjeun téh
nu ngamalirkeun kahéman tina teuteupan
ngagalurakeun motahna rasa
nu moal leber ku cangcaya
SAJAK
KAMELANG
Sajak kuring sajak kamelang
Nu kamari peuting nungtut ditataan
Dikoréhan, dicokélan, dibukaan
Disurupkeun kana wirahma kamelang
Ngarah akur jeung galindeng hariwang
na jero tarang nu longkewang
Sajak kuring sajak kamelang
Nu bacacaran ka saban madhab
Nyangsaya di pangkéng mongkléng
Ngulahék paduli poék
Sawaréh rangsak pabalatak
Sésana kabawa palid cimata
Nu nungtut ragragan, lir samoja maluguran
Sajak kuring sajak kamelang
Nu melang ka diri sorangan
Sok sieun siga sajak nu bacacaran
Ngampar acak-acakan
Hariwang
Diri teu merenah deui
Hariwang
Diri teu manggih aji
Cimaragas, September 2010-09-16
SAUR
SALIRA
Salira nu miang
Ngestokeun ucap basa piwejang
Tina rangkadakna rangrang
Neang tempat endah nu can kasorang
Saur salira
Ayeuna rangrang tinggal regang
Pada nutuh runtuh
Nu ditatah geus jadi runtah
Salira nyandak diri rek nyorang jalan
Naha kacumponan?
Cenah kabagjaan
